كواحد من الناس بأعشق الأكل والتسالى عارف ان فيه مخاطر كتير جدا أهمها
بالنسبالى:
· السمنة
مش شرط إنها حاجة حلوة ولا وحشة بس أنا مش بأحب انى أكون بكرش مثلًا
· مقاومة الأنسولين والسكر
اللى للأسف بقوا حاجة طبيعية الواحد يصاب بيهم ونسينا نفهم ليه بنصاب بالمشاكل دى واللى مثلا بتكون خلاص حياة الواحد اتشقلبت ومفيش حل (اقصد لمرض السكر يعنى)
وطبعًا اننا ما ينفعش نعتبر الأكل تسلية.. لكن للأسف طبعا ده مستحيل بالنسبالى 😅
مع البحث والتجارب الشخصية ده اللى اتعرضت ليه:
1- بدون نظام محدد:
وهو انى بكل بساطة كل ما أحس انى عكيت وكرشى هيشد حيله أقوم موقف حلويات
ومنتجات المخبز وأكتفى قدر الإمكان بالوجبات الأساسية كفطار وغدا وعشا. واتحمس انى
العب رياضة حتى في البيت بس التزم بيها.
وفعلا خلال أقل من شهر بألاقى الدنيا ضبطت.. لكن بارجع اكمل عك في الأكل
تانى.
2- نظام ضبط السعرات Low Calorie Diet
وده يعتبر أشهر أنظمة الغذاء.
للأسف لقيت الموضوع سخيف ومش منطقى أقعد أحسب باقى حياتى سعرات الأكل. ده
غير عدم الدقة أصلا في المعلومات اللى مكتوبة على المنتجات، وصعوبة الحفاظ على
النظام ده مع محاولة سد رغبة الواحد في انه يستمتع بالأكل. ده غير رغبة الانسان
الملحة انه يآكل حاجات مضرة مليانة سكر ونشويات ومفيش حاجة في أنظمة السعرات تظبط
ليك فوائد الأكل.
- فهل يعنى لما آكل بنفس سعراتى المطلوبة انى أضبط جسمى باتون ساليه وشوكولاته جسمى هيتبسط يعنى!
أكيد لأ.. لكن محتاج نظام غذائى تانى مبنى على أهمية نوع الأكل وادمجه مع السعرات.
فزهقت وما اقتنعتش
3- نظام ضبط الهرمونات والصيام المتقطع – Keto, Low
Carb Diet and Intermediate Fasting:
كملت بحث فترات طويلة لغاية ما سمعت عن الكيتو واللى منه فهمت النظام قليل الكربوهيدرات.
ما اقتنعتش بالكيتو أبدا وكان منطقى بالنسبالى ان الواحد مستحيل يلتزم بيه
باقى حياته في ظل طبيعة حياتنا والجرى واللخبطة وحتى ماديًا.
لكن اللى فعلا عجبنى وكنت حاسس ان ده الأقرب للمنطق وأسهل في الالتزام هو
انى أفهم ازاى جسمى بتفاعل مع الأكل من كذا جانب:
· نوع الأكل المطلوب
وتأثيره على الجسم؟
- يعنى جسمى هيتأثر ازاى لما اتغدى لحمة وخضار ورز.. ولا ساندويتش فول بالبيض..
ولا طبق كشرى
· اختلاف تفاعل الجسم مع اختلاف
الأصناف في نفس الوجبة؟
- يعنى مثلا هل الأصح انى اتغدى
برز ولا بعيش! ولا ما ادخلهومش أصلا؟
- هل صح انى آكل فول مع
بيض؟
- هل صح انى آكل خضار كتير
مع الحمة ولا قليل؟
- أزود السلطة ولا لأ؟
· تكرار تعرض الجسم للأكل؟
- وأختلاف رد فعل الجسم لما
اكرر التعرض لمنتجات الأكل المختلفة يعنى هل الصح انى أقسم وجبتى على مدار اليوم؟
ولا آكلها مرة واحدة.
- ويا ترى لما آكل طبقة
السلطة على فترات في اليوم زى ما كل شوية أخد حتة كرواسون؟
· توقيت الأكل؟
- فمثلا يا ترى الأحسن انى
آكل الصبح بدرى ولا نص اليوم ولا بالليل.
- ايه الضرر لو بدلت
الوجبات وأكلت الغدا الصبح بدرى واتغديت بساندويتش فول!
- يا ترى الصح آكل قبل
التمرين ولا بعده ولا ما أكلش خالص؟
كل الأسئلة دى لقيتلها الإجابات في نظام Low Carb Diet
اللى بكل بساطة فهمت منه ازاى جسمى بيتفاعل مع الأكل وانواعه وازاى اعمل
وجبة صحية بدون قلق زيادة عن اللزوم وكمان ازاى اختار الأكل الصح.
وأهم حاجة إنى فهمت مخاطر السكر والنشويات والأكل اللى غلط ناكله مع بعض وازاى
الصيام المتقطع بيفيد الجسم جدًا جدًا جدًا.
ودى مصادر أتمنى تفيدكم في الموضوع ده:
· دكتور وعد أمين
أولا لان هي دكتورة فهى أحسن من ناس غير مؤهلين للكلام في الأمور دى
ثانيا لانها بتقول الأسباب بتفسير علمى ممكن بسهولة تروح تبحث عن اللى هي بتقوله
وتتأكد منه
- قناة يوتيوب:
Dr Waad Amin - Fitness Nutritionist - YouTube
- وممكن تبدأوا بالفيديو
ده:
التخسيس في رمضان بالتفصيل، فطار وسحور وحلويات - YouTube
- وده:
٤ حاجات هاتحصل في جسمك لما تبطل السكر - YouTube
· دكتور بيرج
وده برضه أحد أشهر الناس في الموضوع ده..
والفايدة الأكبر منه بالنسبالى هو في فهم جسمى بيحتاج ايه من الأكل وازاى اعرف انا ناقصنى ايه
- دى قناته على يوتيوب:
- ودى مقدمة مفيدة جدا:
The Truth About Fasting: What Really Happens to Your Body? - YouTube
- ودى قناة ليه مترجمة
للعربى:
_________________________________________________________
للأسف مش قادر اشرح أي حاجة بالتفصيل لانى مش متخصص في العلوم دى كلها وقد
أعبر عن فهمى بشكل يضر غيرى.
فهاكتفى بسرد المصادر اللى فهمت منها ده.