صغيرى،،
اوعى تتلزق فى حد، ولا تحاول تاخد مكانة ليك من حاجة فى الدنيا.
الناس عايشة على أوهام ونفسها تحس بإنجاز. معلش مساكين ومطحونين فى الدنيا. نفسهم يتشعبطوا فى أى حاجة، لانه يا عينى بيتقال لهم على تعبهم كله ده مالوش لزمة.
لاعب كورة، ولا عالم، ولا تاريخ قدماء حتى.. كلها أوجه بنحاول نسد بيها فراغ جوانا، فراغ ما اتملاش صح.
اتمنى ييجى الوقت وتقدر تميّز.
ولما تستشعر الايمان بالله وتعرف ان عملك ونواياك هما بوصلتك لسعيك عشان يرضى عنك هتفهم قصدى.. وتدى الحاجات دى قدرها.
تلاقى الواحد سافر أوروبا وساخط على كل حاجة شافها فى حياته قبل كده، حتى الحاجات الحلوة.
وتلاقى التانى قاعد على القهوة ناحر نفسه، وشادد أعصابه، وبيتخانق فى دبان وشه عشان فريقه خسر! ما هو عمال يحسبها هيورى وشه لزمايله ازاى بكرة فى الشغل! ما هيتحرق دمة تانى!
وهما التانيين بغبواتهم هيغيظوه قال يعنى عملوا انجاز!
وخلى بالك من اللى زيهم تحت مظلة الدين، العيب مش فى الدين، معلش غلابة ولسه بيفهموا.
مش المشكلة فى السفر ولا الرياضة ولا الهزار.. المشكلة فى البوصلة!
جرب واستمتع وشوف ونافس،،
بس شوف بوصلتك رايحة فين عشان تحدد يعنى ايه انجاز. وليه أصلا؟ هو لازم يعنى يبقى فيه انجاز الناس تشاور عليه!
انت بتعبد ربنا ولا الناس!
عشان لما تسافر وياما تشوف،
وتلعب وياما تخسر،
وتحاول ياما تفشل،
تبقى عارف انت بتعمل ايه، وليه.
أرجو انك ما تتلزقش فى حد.
________________________
سر فى ودانك ما تقولوش لحد:
خليهم يتلزقوا فيك ووريهم الطريق الصح...
بس اياك... تلزق معاهم!
عشان لما تسافر وياما تشوف،
وتلعب وياما تخسر،
وتحاول ياما تفشل،
تبقى عارف انت بتعمل ايه، وليه.
أرجو انك ما تتلزقش فى حد.
________________________
سر فى ودانك ما تقولوش لحد:
خليهم يتلزقوا فيك ووريهم الطريق الصح...
بس اياك... تلزق معاهم!