1- اوعى تتنازل عن مبدأ "لله رب العالمين" في أي حاجة بتعملها في
حياتك
2- اوعى تنشغل بالخلافات
3- أرجوك أرجوك ما تنبهرش بالناس.. هتتصدم والله
4- ولا تخلى حد يخليك تنبهر بنفسك.. هتتكبر وتبقى شخص مقيت
5- اوعى تنخدع بالكلام الحلو من الناس.. نصه جهل والنص التانى نفاق
6- وقت ما تهتم بالمظاهر.. دى بداية الشخصية الزبالة اللى هتتحولها
7- وقت ما تقتنع إنك كده برنس وعارف كل حاجة دى بداية نهايتك كشخص محترم
8- اوعى اوعى تسعى انك تلم الناس حواليك عشان تحس انك حد مهم ومؤثر
9- ايوة فيه حاجات خير لما تيجى تعملها هتلاقى الناس حواليك.. فكّر نفسك إن
ده "لله"
10- اوعى تضعف قدام المجتمع في الحاجات اللى كنت مقتنع انها غلط ودلوقتي
بقت عادي.. دى فتن.. وكده كده بنقع.. بس الحق اللى تلحقه
11- اوعى تقلد الناس وخلاص.. كده انت بتفقد شخصيتك وهتبقى امّعة
12- مش معنى كده برضه انك بالفعل حد جامد جدا ومش محتاج تغيير.. لازم تنقد
نفسك وتراجع نفسك أول بأول وتحاول تغيرها للأحسن
13- وانت بتعمل أى حاجة في الدنيا.. تأكّد إن كل صغيرة وكبيرة دول اختبار
من ربنا.. خصوصا وانت داخل نيتك لله.. اوعى تغفل بقا وخلى بالك.. ربنا قال "أَحَسِبَ
النَّاسُ أَن يُتْرَكُوا أَن يَقُولُوا آمَنَّا وَهُمْ لا يُفْتَنُونَ"
14- كتير جدًا من الناس مش بتعمل الخير"لله".. بس برضه مش انت
اللى تحدد الشخص ده فعلا صادق ولا لأ.. دى بتاعة ربنا.. مجرد ده يبقى في دماغك كحاجة
عامة عشان ما تتصدمش في تصرفات الناس وقت المواقف الصعبة
15- الفتن كتير جدًا جدًا جدًا.. أكتر وأصعب مما تتخيل.. بتبتدي الوقوع
فيها بالتنازل عن المبادئ الفطرية اللى كانت عندك زمان
16- طول ما انت بتحاول تبرر حجج لمبادئ أو تصرفات معينة.. اعرف انها غلط
وانت بتحاول تقنع نفسك انها صح
17- اوعى في يوم حد يقنعك إنك اقل منه وهو اللى بيفهم ولازم تسمع كلامه
18- ما تستناش حد يقف جنبك.. لو وقف خير وبركة.. لو ما يوقفش ما تتصدمش
19- ما تتوقعش الخير من كل الناس
20- ما تنبهرش بكل الخير اللى بيعمله الناس لان كتير منه وراه أفكار تانية
مش هتعجبك
21- وانت داخل على أى مشكلة زي ما تبقى عارف مين هيساعدك زي ما تكون حاطت
احتمال انك هتواجه كل المصايب لوحدك.. وده اللى في الغالب بيحصل
22- اوعى تتوقع ان الناس مش هتخذلك فيما يتعلق بأصحابهم أو بمصالحهم
الشخصية أو بمنظرهم الإجتماعى أو بأمراضهم النفسية
23- اياك ثم اياك تعمل حاجة انت مش مقتنع بيها
24- وقت ما تأمن لتصرفات الناس هتلبس مقالب محترمة
25- اوعى تزعل من أى حد حقير عمل فيك موقف مش كويس.. دي دروس حلوة
للمستقبل.. دلوقتي ببلاش.. بكرة هتبقى بفلوس
26- راقب وحلل الأشكال دي واتعلم ازاى ما تكونش زيهم
27- شوف الاخطاء والفتن اللى هما وقعوا فيها وتجنب أى مداخل ليها
28- اقرا كتير جدا عشان تفهم الدنيا كويس.. اقراااااااا كتييييير
29- بعد ما تقرا ما تبقاش زي الحمار وتغير كل وجهات نظرك زي ما الكاتب
بيقولها.. ده بشر زيك والكتاب ده مش منزل من عند ربنا.. افهم وحلل وناقش
30- اقرا كتير عن سيكولوجيات الناس عشان تتوقع تصرفاتهم كويس
31- اوعى تتصدم بالبلاوي اللى هتبتدي تدركها بعد ما تفهم الناس وتحلل
تصرفاتهم
32- معادن الناس كتيرة جدًا.. واغلبيتها مصدية.. أه والله.. مصدية
33- وقت ما المسؤوليات هتزيد عليك هتلاقى الدنيا بتدوس عليك أكتر.. هتلاقى
الناس بتخذلك أكتر.. هتلاقى كل حاجة بقت غريبة
34- في الوقت ده هتلاقى دايرة أقرب الناس ليك بتقل وبتتفلتر تلقائي كده..
ده اختبار من ربنا اوعى تفرفر
35- كل ما الوقت هيعدي هتتعور من جواك أكتر بس اوعى تصاب بالاحباط
36- ايوة رغم ده كله لسه فيه ناس كويسة.. كويسة جدًا وجواهم لسه نضيف.. بس
قليلين شوية
37- اوعى تخسرهم
38- اوعى تتخلى عنهم
39- اوعى تتخلى عن ايمانك ومبادئك
40- لو الطريق مش بيحقق اللى انت عايزه "غيّره".. "غيّره".. "غيّره"
___________________________
مصدر الصورة: Patternatic (pinterest.com)